Lajmi

Nga Agim Xhafka

-Shef, një burrë ka vrarë me sopatë gruan e vet. Fute te lajmet on line.

-Ok, por na sill hollësira.

********* ************ ***********

-Shef, gruaja, viktima pra, paska pas një të dashur. Ndaj burri e vrau për xhelozi.

-Ok, mos iu ndaj. Po e shtoj te lajmi që solle që parë.

*********** ************* ********

-Shef, nga burimet e mija mësova se dhe fëmijën 10 vjeçar e ka me dashnorin.

-Ua,ua, ç’bëhet kështu! Po e vëmë lajm në faqen e parë.

**************** ************ *******

-Shef, kemi një pasaktësi. Nuk qenka vrarë gruaja, por burri.

-Mos, paskemi tjerrë lesh deri tani. Po e le siç është se po e ndryshuam do na quajnë media jo serioze.

************** ************* **********

-Shef, as burri nuk qenka vrarë. Është qëlluar me çekiç komshiu nga burri i kësaj gruas. Flitet për punë borxhesh a llotosh. Por do pyes burimet…

-O goce, pyesje më parë burimet se tani gënjeshtra na u bë lumë.

************* *********** ************

-Shef, lajmin e kisha të saktë. Nuk gaboj kollaj. Burri e ka vrarë gruan. Siç ta thashë në fillim. Por ngjarja nuk qenka në Fier.

-Po ku?

-Në një fshat të Meksikës, Ferione a Ferjana nuk e saktësoj dot. Andaj për pak u bëmë lëmsh…