Lezhë/Nënkryetarja Marku: Kryeministri kriminel ka filluar gjuetinë e shtrigave

Nënkryetarja e Bashkisë Lezhë Alfrida Marku, ka reaguar pas arrestimit të kryetarit të Bashkisë Fran Frrokaj, së bashku me 11 zyrtarë të tjerë, lidhur me abuzimin me tjetërsimin e pronave në Shëngjin. Në një deklaratë të postuar në facebook, ajo e quajtur arrestimin e Frrokajt si një hakmarrje politike nga ana e kryeministrit Edi Rama, të cilin e quan kriminel dhe e paraljmëron se do ta marrë përgjigjen në Lezhë sa herë që do të përballet me qytetarët e ndershëm.

Reagimi i saj:

Politikisht, kryeministri kriminel, kriminelët e tij në Lezhë dhe kriminelët që e duan Lezhën pa kundërshtar, do ta marrin përgjigjen sa herë të përballen në Lezhë dhe me qytetarët e saj të ndershëm.

Ndryshe nga mandati i parë ku Rama i bënte presion prokurorisë dhe gjykatave duke i marrë dhe personalisht në telefon për të mos hetuar zyrtarët e partisë së tij të korruptuar dhe të lidhur me krimin, duke qenë kështu imunë për paprekshmërinë e tyre, tani me futjen në dorë të organit të akuzës kryeministri i kokainës, jo vetëm ka garantuar paprekshmërinë e të tijëve në pushtet vendor dhe qëndror, por ka nisur gjuetinë e shtrigave, presionin, dhunën e hakmarrjen politike ndaj zyrtarëve të Partisë Demokratike.

Dhunimi i lirisë së Kryetarit dhe zëvendës kryetarit të Bashkisë Lezhë, dhe ndaj institucionit, si hakmarrje e presion politik dhe duke instrumentalizuar e dhunuar autoritetin e organeve të drejtësisë është skandaloze dhe e pajustifikueshme. Dëshmon se Shqipëria është në ekstremin e paligjshmërisë, dhunës për arsye politike dhe kriminalitetit të strukturuar, ideuar dhe mbrojtur nga Rama dhe të tijtë.

Asnjë presion qeveritar, asnjë luftë politike nuk zbeh apo deformon autoritetin e asnjërit.