Ligji “Për Noterinë”, Kuvendi rrëzon dekretin e Presidentit Meta

Kuvendi i Shqipërisë vijon punimet e seancës plenare të së enjtes, ndërsa me vetëm votat e maxhorancës ka rrëzuar dekretin e Presidentit Meta për noterinë.

Maxhoranca ka rrëzuar me 75 votat e saj këtë dekret, ndërsa 19 deputetë të opozitës kanë votuar pro dekretit të tij.

Po ashtu maxhoranca ka votuar edhe projektligjet e rendit të ditës, ku ka miratuar dekretin e Presidentit “Për Kadastrën”.

Ligji per Noterine

Sipas Presidencës, përmbajtja e nenit 61 të ligjit “Për noterinë”, nuk është i qartë dhe në harmoni me disa nene të tjera të këtij ligji. Gjithashtu sipas presidentit në ligj nuk garantohet trajtimi i barabartë i noterëve përballë kostos që duhet të përballojnë për sigurimin e veprimtarisë së tyre dhe nuk ofrohet siguri ligjore për mbrojtjen dhe mbështetjen e shtresave të pamunduara të shoqërisë.

Ndërsa ai i kadastrës në argumentimin e Presidencës kishte mangësi të theksuara në kornizën ligjore, një argumentim i aprovuar edhe në Kuvend.

“Në respekt të Kushtetutës së Republikës së Shqipërisë dhe në ushtrim të së drejtës të parashikuar në pikën 1 të nenit 85 të saj, Institucioni i Presidentit të Republikës bën me dije se me Dekretin nr. 11055, datë 15.01.2019, Presidenti i Republikës ka vendosur kthimin në Kuvend të ligjit nr. 111/2018 “Për kadastrën”, me qëllim rishqyrtimin e tij, sipas arsyetimit bashkëlidhur këtij dekreti.Komisioni argumenton se, së bashku me projektligjin “Për përfundimin e proceseve kalimtare të pronësisë”, ky projektligj përbën produktin e veprimtarisë së grupit ndërinstitucional të punës dhe paraqitet si një “përgjigje” ndaj mangësive dhe problematikave që ky grup ka konstatuar, në kornizën ligjore aktuale, marrëdhëniet juridike të krijuara në bazë të saj dhe në strukturat ekzistuese shtetërore që veprojnë në këtë fushë”, thuhej në vendimin e Presidentit.