Ligji për të huajt, ministri Hoxha: Pjesë e përmbushjes së detyrimeve për procesin e anëtarësimit në BE

Ministri i Brendshëm, Ervin Hoxha prezantoi në Kuvend projektligjin “Për të huajt”. Ai nënvizoi se ky projektligji nuk është thjesht një ndërhyrje në ligjin ekzistues “Për të huajt”, por një hap strategjik i ri i Shqipërisë më të drejtë, për sigurt dhe më të përgatitur për të përballuar sfidat e së ardhmes.

Hoxha nënvizoi se projektligji është në përmbushje të angazhimit të drejtpërdrejtë të qeverisë shqiptare për të garantuar të drejtat themelore të çdo individi që kërkon të jetojë, punojë dhe integrohet në vendin tonë. Ministri vijoi më tej duke theksuar se projektligji “vjen si pjesë e zbatimit të Strategjisë Kombëtare për Migracionin, që i jep fund një epoke dhe qasjes fragmentare dhe i hap rrugë një menaxhimi të integruar, efikas dhe më human të migracionit dhe kufirit”.

”Së pari, garantimi i të drejtave dhe mbrojtja sociale për migrantët, refugjatët dhe azilkërkuesit. Nisma u jep fund pasigurive ligjore, që për vite me radhe ka rënduar mbi shumë individë të cilët kanë pasur dhe vonesa herë pas here. Ajo mundëson akses dhe programe integrimi, shërbime sociale dhe juridike, si dhe proces më të qartë për të drejtat e aplikimit;

Së dyti, përmirësimi i procedurave dhe digjitalizimi i tyre. Kemi thjeshtuar dhe shkurtuar afatet për aplikim, duke e bërë më të lehtë për punonjësit shumë të kualifikuar të huaj, që të kontribuojnë me aftësitë dhe përvojën e tyre në zhvillimin e vendit tonë;

Së treti, është krijuar një kuadër institucional më i fortë dhe më i koordinuar për menaxhimin e migracionit. Për herë të parë, përgjegjësitë e institucioneve janë të qarta me te lidhura me njëra-tjetrën në mënyrë funksionale dhe llogaridhënëse”, tha ministri.

Sipas Hoxhës këto ndryshime janë pjesë e përmbushjes së detyrimeve tona ndërkombëtare, në kuadër të procesit të anëtarësimit në Bashkimin Europian, dhe konkretisht përputhen me kërkesat e Kapitullit 24 të Acquis së BE-së që lidhet me drejtësinë, lirinë dhe sigurinë.