Liri Berisha për Nënë Terezën: Nuk e prisja që të vendoste lule mbi varrin e Enver Hoxhës

Liri Berisha në librin e saj më të ri ”Nënë Tereza në jetën time”, përpos vlerësimit dhe admirimit për gruan shqiptare më famshme në botë, ka shprehur momente zhgënjimi për të. Berisha shkruan se nuk e priste që Nënë Tereza, gjatë vizitës së saj të parë në Shqipëri në 15 gusht 1989, të vendoste lule mbi varrin Enver Hoxhës si dhe të takonte të venë e diktatorit, Nexhmije Hoxhën.

Bashkëshortja e ish-kryeministrit shprehet e zhgënjyer për këtë veprim të Nënë Terezës, por nga ana tjetër nuk thotë asgjë për bashkëshortin e saj, Sali Berisha, pjesë e ish-Bllokut, doktor i Byrosë Politike dhe një njeri që shfaqej në oxhakun e Nexhmije Hoxhës, në varkë, dreka dhe darka me familjen e Enver Hoxhës si dhe në zyrën e Ramiz Alisë.

Liri Berisha ka një shpjegim se pse Nënë Tereza vendosi lule tek Varri i Enver Hoxhës. Sipas saj, ky veprimi ishte një kusht i fshehtë i regjimit, në këmbim të vizitës në vendin ku preheshin nëna dhe motra e saj.

”Sipas shkrimeve të motrave të misionit, që shoqëronin Nënë Terezën, kërkesa e parë e saj sapo mbërriti në Rinas, ishte te vizitonte vendin ku preheshin nëna dhe motra, të vendoste lule mbi varrin e tyre. Kjo kërkesë do të pranohej nga regjimi i kohës, vetëm me kushtin nëse fillimisht ajo do te vizitonte varrin e Enver Hoxhës. Regjimi komunist e kishte përgatitur këtë vizitë sipas një protokolli rigorozisht të kontrollueshëm. Qëndrimin e saj e kam menduar dhe shpjeguar si një pajtim, që vetëm ajo si një qenie e pastër e Zotit mund ta bëj, si një qenie që nuk mban mëri, mbase edhe për të kërkuar mëshirë për shpirtra të paqetë”.