Liroi ”të fortët”, gjyqtarja Hoxha: Më ktheni paratë e sekuestruara

Në Gjykatën e Posaçme të Apelit, këtë të hënë u mbajt seanca gjyqësore në ngarkim të ish-gjyqtares së Krujës, Enkelejda Hoxha, e njohur si gjyqtarja që liroi nga burgu të ”fortët”. Pala mbrojtëse ka kërkuar pafajësinë e gjyqtares Hoxha duke argumentuar se vendimi është dhënë nën trysni politike por dhe mediatike.

Gjyqtarja ka kërkuar dhe kthimin e parave të sekuestruara. Kërkesat janë kundërshtuar nga Prokuroria me arsyetimin se heqja e sekuestros nuk është kërkuar në ankimimin e çështjes. Pasi ka bërë dëgjesën e dy të palëve trupi gjykues pritet të shpallë vendimin më 11 tetor.

Enkelejda Hoxha u shkarkua nga detyra e gjyqtares më 17 mars dhe u la në burg nga Gjykata e Apelit, edhe pse disa herë kërkoi lirinë me pretendimin se kishte dy fëmijë të mitur për të cilët duhet të kujdesej.