Llixhat e Elbasanit, i rrethuar me baltë dhe plehra

Llixhat termale në Elbasan njihen në të gjithë vendin, por edhe më gjerë për efektin e tyre kurativ. Kjo ka bërë që në këto llixha të vijnë një numër i konsiderueshëm vizitorësh nga vendi, Kosova dhe Maqedonia e Veriut.

Përpos vlerave kurative që i ka falur zoti, Llixhat ofrojnë një pamje të rëndë për syrin e vizitorëve por edhe të banorëve të zonës, me rrugë të pashtruara me baltë dhe me plehra të hedhura vend e pa vend. Situata në llixha pranohet edhe nga zyrtarët e Bashkisë së Elbasanit, të cilët premtojnë se vitin e ardhshëm kjo gjendja pritet të ndryshojë.

”Është hartuar projekti i qendrës kurative dhe po bashkëpunohet për zhvillimin e këtij projekti që na është premtuar se do të financohet vitin e ardhshëm”, thotë Ndriçim Sinani, drejtor i shërbimeve në Bashkinë Elbasan. E derisa premtimet të bëhen realitet, banorët e dhe vizitorët e llixhave do të bashkëjetojnë me kushtet aspak të denja për një vend kurativ.