Luçiano Boçi dorëzon mandatin si deputet: Më pëlqejnë betejat dhe të nxis një investim

Kandidati i koalicionit ”Bashkë Fitojmë” për bashkinë e Elbasanit, Luçiano Boçi pati këtë të enjte në seancën plenare fjalimin e fundit si deputet, ku teksa bëri me dije se do të dorëzojë mandatin për të vijuar fushatën zgjedhore për 14 Majin, shtoi se i pëlqejnë betejat dhe se të jetë me njerëzit e vërtetë të këtij vendi, të ndihmojë dikë.

“Po e dorëzoj sot mandatin me kushtin që të jem më pranë njerëzve të mi, qytetarëve të Elbasanit. Një mekanizëm që vret besimin dhe shpresën e qytetarëve. Këtu jam ballafaquar me kundërshtar luftarak dhe me kolegë, i kam falur shpifjet me idenë se falja është hyjnore. Ky vend më ka pëlqyer për dinamikën, të bukurën e politikës dhe të shëmtuarën e saj.

Nuk jam nga ata që dorëzohem. Më pëlqejnë betejat dhe sfidat, sikurse më pëlqen të jem me njerëzit e vërtetë të këtij vendi, të nxis një investim, të ndihmoj dikë. Jam i bindur që edhe ju këtë dëshironi, pavarësisht detyrimeve dhe joshjeve politike. Më është dhënë privilegji që dikush mund ta quajë sakrificë.

Privilegj për të qenë në bashkinë time të Elbasanit, e shoh si mundësinë e artë për t’i kthyer të gjithë shkëlqimin, meritën dhe lavdinë e dikurshme. Fati i një qyteti mund të ngjajë i vogël por është madhërisht i rëndë si gur prehistorik në ndërgjegjen e qytetarëve”, tha Boçi.