Lufta ndaj Covid-19, shefja e Infektivit: Sot filluam trajtimin me plazmë

Shefja e Infektivit, Najada Çomo, ka dhënë një lajm të rëndësishëm për të gjithë pacientët e infektuar me Covid-19.  Teksa bisedonte me kryeministrin Edi Rama, tha se ka filluar trajtimi i pacientëve të infektuar me plazmë gjaku nga dhurues që e kanë kaluar më parë Covid-19.

Në këtë plazmë gjendet anti-trupa që luftojnë Covid-19 dhe në këtë mënyrë shanset për shërimin e pacientëve të infektuar janë më të mëdha. ”Fitorja e kësaj lufte është bërë fal mjekimi të bërë tek Infektivi. Në saj të barnave që përditësohen nga bota dhe qeveria na i ka sjellë. Ka një muaj e gjysmë që përgatitemi për plazmën sot filloi mjekimi i dy pacientëve. Sot u bëjmë thirrje popullatës që të dhurojë gjak ata që e kanë kaluar. Është e rëndësishme. Ne jemi një skuadër e madhe dhe e bashkuar. Kemi staf të shtuar dhe prurje të reja. Kemi infermierë”.

Pasi fitoi betejën me pandeminë e Covid-19, mjeku i njohur Roland Xhaxho mësohet se ka dhuruar plazmën e gjakut, në ndihmë të pacientëve të infektuar dhe që ndodhen në gjendje të rëndë. Lajmi u bë i ditur nga Ministrja e Shëndetësisë, Ogerta Manastirliu, përmes një postimi në facebook. Ajo u shpreh se është krenare për mjekët, që me shembullin e tyre, përçojnë vlerat e humanizmit dhe solidaritetit për atë që ka më shumë nevojë.