Mafia shqiptare në Dubai, kandidati për ambasador: Marrëveshja ekstradimit do jetë prioriteti im

Edhe këtë të hënë në Komisionin e Jashtëm kandidatët për ambasadorë të depozituar nga qeveria në Kuvend, prezantuan platformat e tyre. Kandidati për ambasador në Emiratet e Bashkuara Arabe, Ridi Kurtezi foli për marrëveshjet për ekstradimet në mënyrë që të marrë fund liria e bosëve të mafies që fshihen në Dubai, tha se do të jetë në prioritetin e tij. Kurtezi tha edhe se puna për një marrëveshje të tillë ka nisur dhe ai do të bëjë çmos që ta shtyjë përpara.

”Marrëveshja e ekstradimit, që nuk është vetëm për ne por për shumë të tjera, do ta shoh me prioritet dhe e kam një nga objektivat e aktivitetit të ardhshëm në atë vend. E specifikova që do jetë prioritet marrëveshje në gjyqësor dhe në atë të ekstradimeve në veçanti. Pro varet si do shkojë ne perspektivë, sepse është e dyanshme”,-tha Kurtezi.

Në raportimin e tij në Komisionin e Ligjeve, një muaj më parë kreu i SPAK-ut, Altin Dumani tha se në Dubai po qëndrojnë një numër i lartë i kriminelëve që në Shqipëri janë në kërkim.

”Problematik fakti që në Emiratet e Bashkuara Arabe, në Dubai qëndrojnë një numër të madh të kërkuarish për vepra penale krim i organizuar që nuk po jepet një miratim për ekstradimin e tyre. Nisur nga kjo, kemi 28 procedime penale të nisura kryesisht”, tha Dumani.