“Mami, po vdes. Nuk marr dot frymë”, mesazhi i fundit i 26-vjeçares nga brenda kamionit ku u gjetën 39 kufoma

Një 26-vjeçare vietnameze, e cila është një prej 39 emigrantëve të cilët vdiqën brenda kamionit ku temperatura ishte -25 gradë, i dërgoi nënës së saj një mesazh ku i thonte se ishte duke vdekur.

Familja e Pham Thi Tra thotë për BBC se vajza e tyre pagoi 30 000 stërlina për të shkuar në Britani “në kërkim të një jete më të mirë”.

Mesazhi i Pham Thi Tra u dërgua 2 orë përpara se kamioni të hynte në Mbretërinë e Bashkuar nga Belgjika.

“Më vjen keq, mami. Udhëtimi im jashtë shtetit nuk pati sukses. Mami, të dua shumë. Po vdes sepse nuk marr dot frymë”, lexohet në mesazhin e 26-vjeçares.

Vëllai i vietnamezez i tha BBC se motra u kishte lënë porosi që të mos e kontaktonin sepse “organizatorët” nuk lejonin telefonata.

Një çift bashkëshortësh, të cilët janë pronarët e fundit zyrtarë të kamionit, u arrestuan sot në Cheshire.