Manastirliu takon mjekët e Infektivit: Rastet kanë rënë, por lufta nuk ka mbaruar

Ministrja e Shëndetësisë, Ogerta Manastirliu, zhvilloi këtë të premte një takim me mjekët dhe infermierët e spitalit Covid 1, ku ende vijon beteja më pandeminë. Duke siguruar mjekët për mbështetjen deri në fund me bonusin special, Manastirliu tha se do të vijohet me ritme të shpejta vaksinimi, për të arritur edhe më shpejt objektivin për vaksinimin e të gjithë popullatës. Duke folur për situatën epidemilogjike, ministrja e cilësoi atë si të kontrolluar, duke thënë se numri i rasteve të reja dhe fataliteteve ka pësuar ulje, por kërkoi të mos ulet vigjilenca në këto momente. Po ashtu Manastirliu tha se pavarësisht lehtësimit të situatës, mbështetja e personelit me bonusin special do të vijojë.

”Unë kisha planifikuar të isha me ju sepse dua që t’ju falenderoj për të gjithë punën dhe impenjimin përgjatë këtyre muajve të vështirë dhe për t’ju falenderuar dhe për t’ju thënë se përmes jush edhe qytetarëve që asgjë nuk ka mbaruar ende sepse për fat të keq Covidi është ende prezent, ende janë qytetarë të cilët vuajnë pasojat e tij. Raste të rënda të cilët janë të shtruar në shërbimet tona spitalore.

Një prej spitaleve Covid-4 është zbrazur sepse ka rënë numri i pacientëve që kurohen, por nga ana tjetër spitali është në gjendje gadishmëri që nëse kemi një shtim të rasteve kjo strukturë do jetë aktive. Numri i pacientëve që po trajtohen në spitalin Covid 1 dhe Covid 3 ka pësuar një rënie, po ashtu edhe numri i fataliteteve mbi bazat ditore. Jemi në një situatë të kontrolluar të epidemisë.

Duhet të punojmë për sot, për nesër dhe për të shfrytëzuar burimet dhe potencialet që kemi mes nesh. Për të gjithë ekipin e mjekëve dhe infermierëve do të vazhdojë mbështetja. Janë më shumë se 4 mijë punonjës të shëndetësisë të cilët kanë përfituar bonusin special të vendosur nga qeveria shqiptare dhe do të jetë deri në ditën e fundit të kësaj lufte. Ne do t’ja dalim sepse kemi fuqinë dhe durimin për të përballuar të gjitha sfidat që na kanë dalë përpara”, u shpreh ministrja.

Manastirliu tha se grupet më të riskuara dhe popullata mbi 60-vjeç, do të vaksinohen brenda muajit maj. ”Lufta ende nuk ka përfunduar. Do të kërkojë kohën e vet. Vaksinimi do ta ofrojë atë rezultat që ne presim, jam e bindur, nga fakti që ne jemi duke vaksinuar, vaksinuar, vaksinuar, dhe nuk do të ndalemi për asnjë moment, derisa qytetari i fundit shqiptar të jetë vaksinuar. Dhe ky është plani ynë ambicioz për pranverën e vitit që vjen. Mendojmë që mund t’ia arrijmë dhe më shpejt, por jemi të vendosur që brenda muajit maj të arrijmë objektivin e 500 mijë vaksinimeve për të gjithë ato grupe të riskuara dhe popullatën +60. Dhe më pas të vijojmë për të vaksinuar sa më shumë, për të mbrojtur jetë”, tha Manastirliu.

Mjeku Pëllumb Pipero u bën thirrje të gjithë qytetarëve që të vaksinohen, por të respektojnë masat anti-covid. ”Situata është e qetë por nuk duhet të na bëjë që të ulim vigjilencën. Duhet të respektojmë masat parandaluese. Duhet të vijojmë me vaksinimin, është e vetmja zgjidhje për pandeminë. Të gjithë qytetarët i ftoj të vaksinohen, të gjitha vaksinat janë të mira, ajo më e mira është ajo që të ofrohet më parë”.