Manjani “shuplakë” prokurorëve: Janë dembelë

Prokurorët shqiptarë janë dembelë, pasi të tillë i ka krijuar sistemi. Deklarata vjen nga ministri i Drejtësisë, Ylli Manjani, sipas të cilit çështjet penale “flenë” si rezultat i pasivitetit të tyre.

Teksa raportoi në Komisonin e Ligjeve lidhur me inspektimet që Ministria e Drejtësisë ka bërë në 8 prokurori të vendit, Manjani tha se janë verifikuar rreth 2 mijë procedime penale, sikundër edhe janë propozuar masa disiplinore ndaj prokurorëve.

“Kontrolli që kemi ushtruar në Prokurori ka qenë i planifikuar. Ankesat për shërbimin e prokurorisë në ministri janë të një numri të lartë që reflekton besimin e ulët të publikut tek ky shërbim. Konstatimi i parë që vihet re është se perceptimi për besueshmerinë e organit te Prokurorise është i ulët”, theksoi ai.

Manjani tha më tej se çështje të tilla si ato të korrupsionit janë ulëritëse dhe kërkojnë prokurorë aktivë në krye të tyre.

Duke e lidhur me reformën në drejtësi, Manjani tha se duhet një kod i ri i procedurës penale.

“Do doja të ndalesha në disa probleme. Aq më tepër se jemi në prag të ndërhyrjes më të thellë, atë të reformës në drejtësi. Ndërhyrjet në kodin e procedurës penale janë të pastudiuara. Duhet një kod i ri i procedurës penale”, nënvizoi kreu i Drejtësisë.