Manovra të rrezikshme me motor uji mes pushuesve, policia bllokon mjetet. Gjobë dy të rinjve

Aktualitet E Martë, 28 Shtator 2021 20:02

Policia Kufitare ka bllokuar dy motorë uji në Durrës, të cilët kryenin manovra të rrezikshme brenda perimetrit të sigurisë, duke rrezikuar jetën e plazhistëve.

Pas njoftimit të marrë nga pushuesit se dy motorë uji po kryenin manovra të rrezikshme lundrimi duke rrezikuar jetën e plazhistëve, Policia menjëherë ka bërë të mundur bllokimin e dy motorëve të ujit.

Në përfundim të veprimeve dy drejtuesit e motorëve të ujit, shtetasit S. Xh. dhe S. J., janë ndëshkuar me masë administrative me vlerën 100 000 lekë të reja secili, për Shkeljen e rregullave të përdorimit të mjeteve lundruese në plazhe e sporte ujore.

Policia e Shtetit falënderon qytetarët për bashkëpunimin dhe i fton ata që të denoncojnë çdo rast të paligjshmërisë në numrin 112 duke iu garantuar reagim të shpejtë, profesional e të paanshëm.