Marifeti i PS-së në Mat: Telefonojnë qytetarët për sondazh dhe prezantohen si drejtuesja e PD

Përdorimi i të dhënave konfidenciale të qytetarëve, të cilat janë marrë nga e-Albania, nuk janë skandali i vetëm i partisë në pushtet.

Një denoncim i pazakontë vjen nga Mati. Anëtarja e Kryesisë së PD në Mat, Mirela Vata ka denoncuar në rrjetet sociale se njerëz nga dega lokale e PS, telefonojnë qytetarët e Burrelit me idenë se po bëhet një sondazh dhe telefonuesja prezantohet në emër të saj.

Sipas Vatës, sondazhi nuk bëhet nga PD, ndërsa iu bën thirrje qytetarëve që të mos i përgjigjen telefonatave që vijnë nga numri 068 99 12 069. Ajo thotë se PS kërkon të marrë të dhënat e qytetarëve që votojnë PD-në dhe po përpiqet të deformojë vullnetin e votuesve, 10 ditë para zgjedhjeve parlamentare, ndërsa paralajmëron me kallëzim në Prokurori.

Deklarata e anëtares se Kryesisë së PD në Mat, Mirela Vata

Sqarim!

Miq, ky numër telefoni: 068 99 12 069, po merr qytetarët matjanë në emrin tim dhe të strukturave të PD, me idenë që po bëhet një sondazh.

Kjo nuk është e vërtetë. Ju bëj thirrje, çdo qytetari matjan, të mos i përgjigjet telefonatave që vijnë nga ky numër. Me siguri pas këtij skandali fshihet PS-ja e Matit, sepse e dinë mirë që janë të humbur dhe nga kjo po bëjnë çdo tentativë, me telefonata të rreme, për të marrë të dhënat e qytetarëve dhe për të manipuluar dhe deformuar vullnetin e votuesve.

Humbja e sigurt e pushtetit i ka çoroditur në kufijtë e absurditetit, sa nuk dinë më se çfarë bëjnë. Thjesht t’i mëshirojmë!

Ndërkohë që ky numër telefoni: 068 99 12 069, do të paditet në polici dhe prokurori. Shumë shpejt do të mësojmë me emra edhe autorët e vërtetë.