Marrëveshja me Shqipërinë, kryeministri britanik: S’do të ketë më gomone të paligjshme

Në 2023, Britania e Madhe do punojë kundër emigrantëve të paligjshëm. Kryeministri Rishi Sunak premtoi se do të trajtojë problemet më të ngutshme të Britanisë, nga ulja e inflacionit deri te dhënia fund e migracionit të paligjshëm.

Në një fjalim që synonte të qetësonte kritikët brenda partisë së tij Konservatore, Sunak tha se qeveria e tij do të ndërtonte “një të ardhme më të mirë për fëmijët dhe brezat pasardhës”. Ai i kërkoi publikut ta gjykonte atë për rezultatet që do të arrijë në përmbushjen e 5 premtimeve, të cilat janë: përgjysmimi i inflacionit, rritja e ekonomisë, reduktimi i borxhit, shkurtimi i listave të pritjes së Shërbimit Shëndetësor Kombëtar dhe ndalimi i gomoneve të vogla që transportojnë emigrantë të paligjshëm nga Franca përtej Kanalit Anglez.

Sunak përmendi marrëveshjen me Shqipërinë, e cila siç tha kryeministri britanik, do ta bënte më të lehtë kthimin e emigrantëve të paligjshëm që kanë shkuar në Mbretërinë e Bashkuar.

Po ashtu Sunak e përfundoi përgjigjen e tij duke thënë se lloji i sistemit që ai “beson se ka kuptim” ishte ai në të cilin legjislacioni lejon që Mbretëria e Bashkuar të dërgojë të ardhurit e paligjshëm atje nga janë ose në një vend tjetër të sigurt, duke iu referuar Ruandës.