Masakër në Shqipëri. Ekzekutime, vrasje dhe shpërthime me tritol në pak ditë
Qytetarët shqiptarë janë zgjuar ditët e fundit nga krisma e armëve që në pak ditë i morën jetën disa shtetasëve. Kemi pasur jo vetëm shpërthime tritoli, por edhe një vrasje në pritë në Rrogozhinë, ku Klevis Kapllani u ekzekutua në një aktivitet të ngjashëm të mirëorganizuar, kemi vrasjen në Bathore të një gruaje 34-vjeçare, e cila u ekzekutua nga ish-kunati.
Ekzekutohet vëllai i të kërkuarit për grabitjen në Rinas
Bujar Çela, vëllai i një prej personave të shpallur në kërkim për grabitjen e famshme të Rinasit, Talo Çelës, është ekzekutuar mëngjesin e kësaj të enjte në zonën e Bradasheshit, pranë qytetit të Elbasanit. Atentati mafioz ka ndodhur rreth orës 05:40 minuta në një lokal që funksiononte 24 orë pranë rrugës nacionale Elbasan-Durrës. Nisur nga e kaluar e viktimës, i cili ka qenë një person pa probleme dhe precedentë, një njeri i përshkruar si familjar dhe i qetë, policia dyshon se atentati i mirë organizuar dhe i dyshuar me pagesë, mund të ketë ardhur për shkak të së kaluarës së vëllait, Talo Çela, që vazhdon të jetë person në kërkim. Ndërkohë, edhe pse ministri i Brendshëm Sandër Lleshaj deklaroi performanca e policisë në qytetin e Elbasanit është rritur ndjeshëm, vrasjet tipike mafioze nuk po ndalen që prej muajit korrik-gusht.
Atentati ndaj Preng Gjinit
Për atentatin ndaj Preng Gjinit, prokuroria ka bindjen se krimi është kryer për hakmarrje. Ai ishte kthyer në Shqipëri për të kujtuar përvjetorin e vrasjes të të vëllait, Tonin Gjini i vrarë gushtin e kaluar. Preng Gjini rezulton të jetë marrë në pyetje pas vrasjes se Kastriot Reçit, i eliminuar me snajper në Rrëshen. Ditën e shpërthimit të ndodhur në kryeqytet dhe në një zonë të populluar, Preng Gjini telefonoi kushëririn e tij në kryeqytet dhe i kërkoi makinën e tij. 51-vjeçari u afrua pranë vendngjarjes duke zbritur nga mjeti i tij ku ishte pasagjer dhe pasi piu kafe me kushëririn mori drejtimin e mjetit tjetër që shpërtheu disa metra më tej. E gjitha kjo përforcon dyshimet se shënjestra ndiqej prej javësh dhe autorët kishin informacion për përdorimin stafete të mjeteve. 6 persona janë shoqëruar për atentatin, ndërsa zbulohet se ai ka ndërruar makinën vetëm 10 minuta para shpërthimit me tritol. Oficerët e Policisë Gjyqësore të Sektorit të Krimeve të Jetës në Policinë e Tiranë kanë marrë tabulatet telefonike të 4 antenave në zonën e “Vasil Shantos” për të analizuar thirrjet hyrëse dhe dalëse, nisur nga fakti që shpërthimi është bërë i telekomanduar me celular. Gjini i druhej një atentati të mundshëm për këtë arsye mësohet se ai tregohej i kujdesshëm në lëvizjet. Ai shkonte shumë rrallë në Rrëshen, ku jeton familja e tij. Familjen, gruan dhe 2 vajzat binjake i kishte dërguar që prej vitit 2019 në SHBA.
Jetmira u vra nga ish-kunati, shkoi të merrte plaçkat
Një tjetër grua mbeti viktimë e krimit në familje. Jetmira Hasani u vra nga ish-kunati i saj, Agron Tanushi, mbrëmjen e së martës në Bathore. Jetmira dhe ish-kunati i saj, ishin të pajisur të dy me urdhër mbrojtje nga njëri-tjetri. Operacioni për kapjen e autorit të vrasjes që tronditi opinionin publik, zgjati 14 orë. Pas identifikimit të zonës ku po fshihej, autori u mbajt i rrethuar nga forcat policore përgjatë gjithë natës. Mësohet se Agroni ishte strehuar tek e motra në Lushnje. Viktima prej vitesh jetonte në Greqi por edhe pse ishte divorcuar me vëllanë e Tanushit, sa herë vinte në Shqipëri, jetonte në shtëpinë e familjes Tanushi. Mes autorit dhe viktimës, ka pasur shumë herë sherre për shkaqe pronësie. Jetmira ka qenë duke zbritur rrobat e saj dhe sendet personale për t’u larguar nga banesa së bashku me fëmijën e saj 8-vjeç por në ato momente ndodhi konflikti me ish-kunatin, që agravoi deri në përdorimin e armëve duke sjellë edhe një viktimë. Në këtë banesë jetën vetëm nëna e autorit dhe familjarët i druhen një hakmarrjeje të mundshme, pasi edhe dje ka pasur një përplasje mes 2 familjeve.
33-vjeçari vritet brenda në makinë
Mëngjesi i së martës nisi me një ekzekutim mafioz në Rrogozhinë. Viktima është 33-vjeçari, Klevis Kapllani i cili u vra shumë pranë shtëpisë së tij në fshatin Sinaballaj. Ka qenë një fshatar i zonës i cili grumbullonte qumështin e zonës, që ka parë makinën me viktimën brenda dhe ka njoftuar policinë. Dyshohet se autorët të cilët mendohet që të jenë dy. Banorët i kanë thënë policisë se kanë parë ditët e fundit persona të dyshimtë qëndronin në hyrje të rrugicës. Dyshohet se viktima është mbajtur nën vëzhgim nga autorët prej disa ditësh. Ata fillimisht i kanë zënë pritë duke vendosur disa shkurre për të bllokuar rrugën dhe më pas e kanë ekzekutuar. Nuk dihet ora e saktë e vrasjes por mendohet të jetë ora 23:00, 24:00 e së hënës kur ai ka qenë duke u kthyer në shtëpi. Autorët kishin hedhur në rrugë disa degë ferrash, si skenar për të detyruar Kapllanin që të qëndrojë dhe në fakt ashtu ka ndodhur. Teksa Kapllani u afrua në një distancë prej gati 200 metra larg banesës së tij, në rrugë ka konstatuar disa degë ferrash që dy autorët i kanë hedhur për ta penguar. Sapo Kapllani ka qëndruar me qëllim largimin e ferrave nga rruga, dy personat janë shfaqur befasisht nga arra me misër që ndodhej buzë rrugës, duke qëlluar nga një distancë shumë të afërt me 14 plumba.
