Masat e reja të Komitetit, flitet për zgjatje të orës policore dhe mbyllje e bareve brenda

Nesër datë 10 shkurt, Komiteti Teknik i Ekspertëve do të bëjnë me dije masat e reja që do të hyjnë në fuqi për të frenuar përhapjen e Covid-19. Kurba e infektimit gjatë muajit shkurt është shumë e lartë krahasuar me muaj e tjerë. Në tryezën e diskutimeve është zgjatja e orarit policor të ndalimit të lëvizjes, për orën 21:00, 20:00 ose 18:00, ashtu siç po bën edhe Greqia e cila ka shifra të ngjashme me tonat të numrit të të infektuarve.

Masat e tjera ndaluese janë mbyllja e disa shërbimeve, kryesisht bareve në hapësirat e tyre të brendshme. Oponenti më i madh i mbylljes është vetë kryeministri, i cili prej dy ditësh flet për forcim të kontrolleve për zbatimin e kufizimeve aktuale, por në asnjë rast mbyllje totale.

Në mbështetje të masave kufizuese sot është shprehur edhe akademia e shkencave. ”Vdekshmëria te ne nga dhjetori në 1%, kurba e përhapjes ka formën e një vargmali me 2 majë, në nëntor. Në të gjitha vendet ka nisur zbritja, ne sot ndodhemi ende në majë dhe presim fillimin e uljes nga vala e dytë. Kjo sepse zbatohen masa më të buta se në Evropë. Për të përshpejtuar uljen duhet të përforcojmë kufizimet për së paku një fazë 2 javore. Përballimi në pandemi në sa më pak dëme në ekonomi”.