Matësat inteligjentë në të gjithë vendin

Banka Europiane për Rindërtim dhe Zhvillim dhe Operatori i Shpërndarjes së Energjisë, i kanë hapur thirrjet për të mbledhur ekspertët, të cilët do të hartojnë strategjinë e vendosjes të matësve të rinj.

Plani për ndryshimin e sahatëve që regjistrojnë në mënyrë manuale, me ata elektronikë, apo siç quhen në gjuhën teknike “smart” është pjesë e Projektit të Rimëkëmbjes së Energjisë dhe do t’i përmbahet 4 objektivave. ”Zëvendësimit të matësve manualë me ata inteligjentë; eliminimin e leximit të energjisë nga faturisti; reduktimin e kostove për personat që janë debitorë dhe zëvendësimin e sistemit aktual të matjes në tensionin e mesëm”.

Në konsulencën që do të ofrojnë ekspertët, qeveria kërkon që të jepen zgjidhje edhe të anës financiare të projektit duke dhënë disa alternativa: zbatim i tij me fondet e OSHEE, apo përmes Partneritetit Publik-Privat. Në një reagim të bërë për mediat, Ministria e Infrastrukturës dhe Energjisë thotë se nuk ka asnjë vendim për formën se si do të realizohet ky projekt. ”Sqarojmë se bëhet fjalë për shërbim konsulence ndërkombëtare, që të hartojë strategjinë e matjes së energjisë elektrike, mbi të cilën do të referohen në të ardhmen institucionet e linjës dhe nuk ka asnjë vendim për vendosje matësash elektronikë me Partneritet Publik Privat, sikurse është përmendur në media”.