Maturantët në fshatrat e Korçës mbeten pa mësim për shkak të transportit

Mungesa e transportit po penalizon disa dhjetra maturantë nga zonat rurale që të kthehen në bankat e shkollës në Korçë për përgatitjen 3 javore para provimeve. Ata do ti vazhdojnë përgatitjet në shtëpi, ndërsa drejtuesit e arsimit thonë se nuk do të penalizohen.

Disa dhjetra maturantë nga zonat rurale po hasin vështirësi për të ndjekur procesin përgatitor për provimet për të cilat janë rihapur dyert e gjimnazeve prej 18 majit.

Ata e kanë thuajse të pamundur të udhëtojnë drejt qytetit për shkak se transporti urban është i pezulluar, ndërsa taksitë janë të shtrenjta.

Kristian Mullalli, është një prej atyre që vuan këto problematika.

“Shumica e nxënësve që frekuntojnë shkollat në Korçë janë nga fshatrrat, 70%. Ky është problem dhe rëndëse e madhe në ekonomitë e shtëpive tona duke qenë se duhet paguar 20-fishi i shumës që ne paguanim për transportin publik për të shkuar në shkolla.”

I pyetur, kryebashkiaku i Korçës Sotiraq Filo thotë se nuk është detyre e bashkisë të garantojë transportin e tyre, por në bashkëpunim me Drejtorinë Arsimore  do të diskutohet për një zgjidhje të mundshme.

“Nuk është përgjegjësi institucionale e bashkisë por situata e krijuar na vë para faktit që duhet të gjejmë një zgjidhje.”

Drejtuesit e arsimit në Korçë ndërkohë thonë se këta nxënës nuk do te penalizohen për mosfrekuentimin e mësimit në këto tre javë.

Atyre u është kërkuar që të mbajnë në vazhdimësi kontakte me mësuesit.

Janë mbi 200 maturantë nga fshatrat përreth Korçës që procesin mësimor e kanë ndjekur në shkollat e qytetit.