Mbahet Kursi i Lartë i Sigurisë, për herë të parë pjesëmarrës nga Europa

Nën vazhdën e pasigurisë që është krijuar në vend, Komisioni për Sigurinë Kombëtare zhvilloi në ambientet e komisionit, një takim me kursantë të Kursit të Lartë të Sigurisë dhe Mbrojtjes (KLSM).

Në këtë takim, ka qenë pjesëmarrës dhe pritës i këtij grupi, Kryetari i Komisionit z. Spartak Braho, së bashku me Sekretarin e Komisionit, z. Piro Lutaj. Nuk ka munguar dhe prezenca e z. Luan Rama, si anëtar i Komisionit të Sigurisë dhe si ish-Ministër i Mbrojtjes. Në fokus, Kursi i Lartë i Sigurisë dhe Mbrojtjes (KLSM) që në fakt është kursi më i lartë në piramidën e arsimit ushtarak në Forcat e Armatosura të Republikës së Shqipërisë. E veçanta e këtij kursi është se zhvillohet në gjuhën angleze. Pjesëmarrës në këtë takim ishin, ushtarakë të gradës kolonel në FA dhe në vendet e rajonit dhe më gjerë, si nga institucionet e sigurisë dhe mbrojtjes së RSH. Këtë vit ndryshe nga vitet e tjera, është se pjesëmarrësit nuk  janë vetëm nga Shqipëria por ka një shtrirje më të gjerë, duke përfshirë pjesëmarrës nga; Kosova , Maqedonia, Turqia , Greqia, Italia , Gjermania dhe Georgia.

KLSM ka një kohëzgjatje prej tre muajsh. KLSM synon të trajnojë ushtarakë me gradën kolonel dhe nën kolonel ose civilë ekuivalentë me ta, në tre fusha themelore: shkëmbim i përvojës midis vendeve të rajonit në fushën e sigurisë dhe reformave të mbrojtjes; të eksplorojë rrugët e përbashkëta për zhvillimin dhe prosperitetin e rajonit; të promovojë përpjekjet e përbashkëta në mbështetje të integrimit euroatlantik.

Takimi ishte në një format shumë të hapur diskutimi,  ku pjesëmarrësit u njohën konkretisht me  rolin dhe ndikimin e institucionit të Kuvendit me anë të Komisionit të Sigurisë Kombëtare në lidhje me çështjet e sigurisë dhe mbrojtjes. Kol. Clirim Toci, shprehu vlerësimin në emër të kolegëve, për çka u informuan dhe për organizimin e kësaj vizite, duke shprehur se edhe në të ardhmen dëshirojnë të ketë takime të njëjtit format.

R.Shtylla