Mbyllja e klubeve të natës/ Rakacolli: Nuk respektuan masat e protokollit

Zv/ministrja e Shëndetësisë, njëkohësisht kryesuese e Komitetit Teknik të Ekspertëve për të përballuar pandeminë e Covid-19, Mira Rakacolli, tha se që në periudhën kur nisi rihapja e aktiviteteve klubet dhe lokalet e kishin të paracaktuar në protokollin e masave që duhet të ndiqnin në mënyrë që të minimizonin mundësinë e përhapjes së infeksionit. Sipas saj, ata nuk i respektuan këto masa.

Nga ana tjetër, Rakacolli duke folur për aktin normative për mbylljen e klubeve të natës dhe ndalimin e muzikës pas orës 20:00, tha se ”e vetmja mënyrë për të ndaluar këtë sëmundje është distancimi fizik, pra mbajtja e masave mbrojtëse, të cilat janë thënë në protokollet e hapjes. Njerëzit nuk i kanë respektuar dhe kanë bërë grumbullime”.

”Distanca e tavolinave, mënyra e vendosjes së karrigeve dhe njerëzve në mjedise të jashtme s’është respektuar. Nuk ka nevojë të dalin pamje, një shëtitje të bënim në mbrëmje nëpër lokale dhe çdo njeri tmerrohej duke e ditur epidemiologjinë, ndërkohë të rinjtë rrinin ngjitur me njëri-tjetrin. Ne nuk kemi gjetur deri tani ndonjë që t’i ketë respektuar masat, për hir të shëndetit publik, në numra të tillë rastesh, patjetër që do të merren të tilla vendime”.

Sa i përket transportit urban, duke i bërë apel qytetarëve të mos i nënvlerësojnë rregullat, Rakacolli theksoi se në autobusa ka rrezikshmëri të ulët përhapje të infeksionit nëse përdoren maskat. ”Në varësi të prirjes që do të ketë pandemia Covid-19 do të diktojë më tej edhe masat që do të detyrohen të merren”.