Mediat: Në 7:00 filluan luftimet në Kumanovë. Qeveria shpall dy ditë zie

Në orën shtatë të mëngjezit sërish kanë filluar të shtënat e fuqishme me armë të kalibrit të rëndë në Qytetin e Kumanovës.

Situata është e tensionuar dhe po vazhdon prania e shtuar policore kryesishtë e përbërë nga njësitet speciale , informon agjencia lajmeve INA.

“Zhurmat e helikopterëve të shumtë të policisë dhe ushtrisë kanë zgjuar nga gjumi edhe banorët e qytetit të Shkupit. Nuk dihet akoma nëse ata janë nisur për Kumanovë” Informon INA

Lidhur me këtë ngjarje dhe konflikt të armatosur ka të dhëna kontradiktore.

Ministrja e Brendshme, Gordana Jankullovska mbrëmë në një konferencë të jashtëzakonshme deklaroi se grupi i armatosur i është dorëzuar policisë, të dhënat në terren konfirmojnë të kundërtën.

Pjesëtar të këtij grupi gjithashtu kanë deklaruar për mediat se Qeveria e Maqedonisë ka përhapur dezinformata se janë arrestuar pjesëtarë të UÇK-së.

“Këtë situatë e kanë inskenuar shteti maqedon për arsye se ata e humbën luftën në ora 11:00. Për t’u nxjerr me fitore kanë vazhduar me popullatë, e për t’i mbuluar vrasjet e tyre në popullin civil i kanë paraqitur si UÇK edhe civilët. Kështu që nga pjesëtarët e UÇK-së s’ka as të vrarë as të dorëzuar, veç të plagosur dy persona dhe askush tjetër”, ka thënë një pjesëtar i këtij grupi.

Sipas tij, “beteja” e Kumanovës i është dedikuar “Komadantit Harun Aliu që u vra pesë vite më parë me Xhafer Shalën në Radushë të Shkupit”.

“Kjo luftë ka pasur me ndodhë me datën 12, pikërisht në datën kur u vranë Komadant Harun Aliu në Radush të Shkupit”, ka thënë ai.

Ndërkohë disa foto të postuara online tregojnë flakët që dalin nga shtëpitë e djegura në Kumanovë mbrëmjen e 9 majit.

Qeveria maqedonase ka shpallur ditë zie 10 dhe 11 majin, ditët kur do të zhvillohet dhe varrimi i policëve të vrarë gjatë aksionit policor në Kumanov.

Nga Ministria e Punëve të Brendshme kanë konfirmuar zyrtarisht se deri më tani janë vrarë pesë policisë dhe 30 të tjerë janë plagosur. MPB nuk ka konfirmuar të dhëna lidhur me vrasjen e pjesëtarëve të këtij grupi dhe të civilëve.