Mediu dhe Idrizi janë kundër protestës, Berisha: Kam mbështetjen e Metës

Para Kryeministrisë, ora 12:00. Kjo është ora dhe vendi i protestës së PD-së, që do të mbahet në ditën e Samitit të parë të Bashkimit Europian dhe Ballkanit Perëndimor. Lajmin e dha Sali Berisha gjatë konferencës së përjavshme me gazetarët në selinë blu. Sali Berisha tha se ka mbështetjen e plotë nga Ilir Meta.

“Aty ku është në traditën e PD pasi Edi Rama dhe ajo ndërtesë është gjenerator i gjithë këtyre të zezave që përjetojnë shqiptarët. Po punohet për një skenar nga grupe specialistësh. PD është parti e shtetit ligjor, ka njoftuar policinë. Kushtetuta e Shqipërisë dhe Gjykata Kushtetuese kanë vendosur, është krejtësisht i panevojshëm autorizimi i policisë. Ne kemi njoftuar. Cila është përgjigjia? Ajo që dikton Edi Rama, që bëri gjithçka dhe kujtoi se me këtë rast, do shfrytojë samitin për të shtypur liritë dhe të drejtat e popullit opozitar. Ne e parashikuam këtë dhe ndaj thirrëm protestën. Kam marrë mbështetjen e plotë nga Ilir Meta për 6 dhjetorin”.

Kreu i PDIU-së, Shpëtim Idrizi thotë se nuk do të jetë i pranishëm në protestën e thirrur nga Sali Berisha. Për të kjo do të jetë hera e parë në 2 mijë vite që 30 krerë shtetesh nga Europa do të vizitojnë Shqipërinë.

Kreu i PR-së, Fatmir Mediu, një nga aleatët e vjetër të Sali Berishës, thotë se nuk do të jetë i pranishëm nëse protesta do të mbahet më 6 dhjetor.

Në një intervistë për ”Euronews Albania”, Mediu tha se atë ditë do të jetë në Uashington, në një takim të Internacionales Demokratike. Për të opozita duhet të konsultohet me partnerët e saj për protestën, si Partitë Popullore Europiane dhe Partitë Konservatore Europiane.