”Mësuesi i vitit 2023”, dominojnë shkollat në rrethe. Manastirliu: Rritje historike e pagave, mesatarja 950 euro në 2024-ën
Në një ceremoni të veçantë të organizuar nga Ministria e Arsimit dhe Sportit janë nderuar sot mësuesit e vitit, të cilët kanë dhënë kontributin e tyre të vyer në përgatitjen e brezave të rinj. Ministrja e Arsimit dhe Sportit Ogerta Manastirliu, ka shprehur mbështetjen e qeverisë shqiptare për rritjen historike të pagave të mësuesve të arsimit parauniversitar brenda vitit 2024.
“Një nga faktorët që ndikojnë drejtpërdrejtë në performancën dhe në rritjen e dinjitetit tuaj është mbështetja financiare. Në vitin 2024 ne do të kemi një rritje pagash të konsideruseshme për mësuesit tanë, duke synuar që në fund të 2024 paga mesatare për mësuesit do të jetë 950 euro”,-tha Manastirliu në fjalën e saj.
Nga ana tjetër, për t’ju përgjigjur sfidave të kohës dhe digjitalizimit, Manastirliu nënvizoi se në fokus të investimeve të MAS do të jetë shtimi i laboratorëve smart në shkolla, me 216 laboratorë gjatë 2024.
Në këtë ceremoni janë vlerësuar me çmime 10 mësues dhe dy ekipe nga shkollat e mesme dhe 9-vjeçare në të gjithë vendin.
Tre çmimet për “Mësuesi i vitit 2023” iu dhanë mësueseve: Adela Puca nga shkolla 9-vjeçare, “Demir Gashi”, Peshkopi, mësuese Oderina Ndreu nga gjimnazi “Asim Zeneli”, Gjirokastër dhe mësues Ramazan Zaimi nga shkolla e Vidhanit në Gramsh.
Çmimi “Mësues Promotor i Talenteve 2023” iu dha mësueses Alketa Nikolla nga shkolla e mesme artistike, “Jan Kukuzeli” në Durrës.
Çmimi “Mësuesi Special 2023” iu dha mësuese Nertila Hoxha nga shkolla 9-vjeçare “Liri Kazazi” në Lushnjë.
Çmimi “Mësuesi i Dalluar 2023″ iu dha mësuese Matilda Hoxha, drejtore e shkollës 9-vjeçare “Riza Spahiu”, në Kukës.
Çmimi “Psikologu/punonjësi social 2023” iu dha mësuese Majlinda Toma nga Gjimnazi “Hydajet Lezha” në Lezhë.
Çmimi “Trajneri sportiv 2023” iu dha mësues Ardit Lamës nga shkolla “Lef Sallata” në Vlorë.
Çmimi “Mësuesi Mjeshtër 2023” iu dha mësuese Edlira Tabaku, nga gjimnazi “Babë Dudë Karbunara” në Berat.
Çmimi “Mësuesi Novator 2023” iu dha mësueses Emirjeta Luzi, mësuese e Informatikës në shkollën e mesme “Sami Frashëri”, Tiranë.
Çmimi “Ekipi më i mirë 2023” për shkollat 9-vjeçare iu dha shkollës 9 vjeçare “Mësonjëtorja e Parë Shqipe”, Korçë.
Çmimi “Ekipi më i mirë 2023” për shkollat e mesme iu dha gjimnazi “28 Nëntori” në Shkodër.
