Ministri i Drejtësisë: Buxheti plotëson nevojat

“Sigurisht që qeveria shqiptare është e angazhuar dhe për vitin 2015, ka një plan dhe një program ambicioz në lidhje me projekt-buxhetin. Ajo që mund t’ju them në vija të përgjithshme është se rritja krahasuar me vitin 2014, e financimit të brendshëm është 13.7 përqind më e madhe. Ky projekt-buxhet është ambicioz dhe rritja është e konsiderueshme, pavarësisht nga nevojat që ne kemi dhe nevojat më të mëdha kanë qenë për sistemin penitenciar, për të cilin çdo vit nga buxheti i shtetit jepen shuma të konsiderueshme. Janë kërkuar për t’u hapur edhe disa burgje të reja të cilat kanë vite që janë financuar me projekte të BE-së dhe një pjesë e financimit ka qenë nga buxheti i shtetit. Me këtë projekt-buxhet ne themi se i plotësojmë nevojat”, tha Ministri i Drejtësisë, z. Nasip Naço.

Gjithashtu Ministri Naço gjatë raportimit të tij e vuri theksin edhe në vendosmërinë e politikave që po ndërmerr institucioni që ai drejton, në kuadër të modernizimit dhe dixhitalizimit të sistemit të drejtësisë në tërësi.