Ministri Tahiri: Një oficer i FBI-së do jetë në Tiranë për hetime

Sokol Balla: Z.Tahiri ju sapo nënshkruat një  marrëveshje me Byronë Federale Hetimore amerikane, apo FBI-në, cili është thelbi i saj?

Ministri Tahiri: Më lejoni të jap një konsideratë për vizitën e Kryeministrit në SHBA dhe takimin me Presidentin Obama, sepse shënon një moment kyç dhe themelor në marrëdhëniet ndërmjet Shqipërisë dhe SHBA-ve nga njëra anë dhe gjithashtu një vlerësim maksimal për reformat që kemi ndërmarrë deri tani dhe në gjithçka që mbetet të bëjmë në vijim.

Sa i takon marrëveshjes me FBI-në pra me Drejtorin e FBI-së, edhe kjo shënon një moment kyç në marrëdhëniet ndërmjet Policisë shqiptare, Ministrisë së Punëve të Brendshme, institucioneve në tërësi dhe punës që duhet të bëjmë bashkërisht më FBI-në për luftën kundër terrorizimit, luftën kundër krimit të organizuar dhe veçanërisht luftën kundër korrupsionit. Është hera e parë që nënshkruhet një marrëveshje dhe një protokoll i tillë, që ngushton mundësinë e bashkëpunimit ndërmjet nesh dhe FBI-së nga njëra anë, dhe nga ana tjetër na vë në pozitën për të luftuar bashkërisht dhe për të arritur rezultate të përbashkëta. Një oficer i FBI-së do të vijë dhe do të ulet në zyrat tona në mënyrë permanente, në mënyrë që të ndihmojë Policinë shqiptare me hetimet dhe ndërkohë FBI-ja merr përsipër trajnime dhe forcimin e kapaciteteve të Policisë shqiptare në luftën kundër krimit të organizuar dhe korrupsionit.

Sokol Balla: Kjo, në kuadrin e strukturës aktuale të Policisë, apo ky është një investim edhe për Byronë Kombëtare të Hetimit nesër?

Ministri Tahiri: Marrëveshja është marrëveshje kuadër që shkon përtej domosdoshmërisë që kemi ne për të ngritur Byronë Kombëtare të Hetimit. Pra Byroja Kombëtare e Hetimit mbetet  një prioritet absolut për t’u adresuar bashkë me partnerët dhe bashkë me FBI-në. Kemi nisur nga puna me trajnimet dhe gjithashtu edhe me skanimin që do u bëjmë burimeve njerëzore të Policisë së Shtetit për Byronë Kombëtare të Hetimit…

Sokol Balla: A është e vërtetë që ka një përzgjedhje paraprake të elementëve të policisë dhe të prokurorisë për këtë strukturë nesër?

Ministri Tahiri: Kemi filluar nga procesi i njohjes paraprake të burimeve njerëzore për të vazhduar pastaj me skanimin dhe procesin e “vettingut” siç quhet, që do të thotë njohja e burimeve njerëzore, verifikimi i të kaluarës së tyre, i aktivitetit, i kapaciteteve profesionale dhe pastërtisë së figurës, përfshirë dhe makinën e të vërtetës. Por bashkëpunimi me FBI-në, siç është parashikuar në marrëveshje shkon përtej Byrosë Kombëtare të Hetimit për forcimin e kapaciteteve të Policisë në tërësi dhe për krijimin e njësive të veçanta që do të duhet të ndihmojnë në luftën tonë kundër korrupsionit krimit të organizuar dhe veçanërisht terrorizmit. Pra nuk kufizohemi vetëm te Byroja Kombëtare e Hetimit por kemi marrë mbështetjen e FBI-së për të shkuar përtej dhe për të ndihmuar kapacitetet e Policisë në tërësi.