Ministrja Denaj takim me sekretarin e përgjithshëm të CIHEAM, në vëmendje siguria ushqimore

Ministrja e Bujqësisë dhe Zhvillimit Rural, Anila Denaj zhvilloi këtë të mërkurë një takim me sekretarin e përgjithshëm të Institutit për Studime të Avancuara Agronomike Mesdhetare (CIHEAM), Teodoro Miano.

Denaj bëri të ditur se gjatë takimit u diskutua rreth ecurisë së projekteve të përbashkëta që po zbatohen në vendin tonë, kryesisht për përmirësimin e infrastrukturës së sigurisë ushqimore, vlera e të cilave llogaritet 5.4 milionë euro. “Jemi duke zbatuar disa projekte bashkë me CIHEAM, me financim total 5.4 milionë euro nga qeveria italiane, në lidhje me përmirësimin e infrastrukturës laboratorike për sigurinë ushqimore”, tha Denaj.

Po ashtu, ajo informoi se me CIHEAM po bashkëpunohet edhe për forcimin e kapaciteteve në shërbimin veterinar, nëpërmjet vlerësimit të bagëtive dhe kompjuterizimit të të dhënave, përmirësimin e standardeve të sigurisë ushqimore në zinxhirin e prodhimit te produkteve tipike lokale shqiptare

Qendra Ndërkombëtare për Studime të Avancuara Agronomike Mesdhetare (CIHEAM) është një organizatë që për 60 vjet kontribuon për të promovuar bashkëpunimin shumëpalësh në fushat e bujqësisë, të ushqimit, peshkimit dhe menaxhimit të territoreve rurale, duke pasur si qëllim t’i përgjigjet nevojave të shteteve dhe aktorëve të agroushqimit.