Ministrja Kushi u uron pushime të mbara nxënësve, dhe ka një këshillë për ta

Ministrja e Arsimit, Sportit dhe Rinisë, Evis Kushi, nëpërmjet një mesazhi në rrjete sociale u ka uruar pushime të mbara të gjithë nxënësve, duke rezervuar edhe një këshillë për ta.

“Pushimet verore tashmë kanë filluar, unë kam një këshillë për të gjithë ju. Shijojeni sa më shumë këtë verë, me lojëra, me aktivitete sportive, por sidomos duke lexuar. Sezoni veror le të na shërbejë për të grumbulluar sa më shumë energji pozitive për vitin e ardhshëm shkollor. Leximi i librave apo edhe përsëritja e njohurive që keni marrë përgjatë vitit që lamë pas, do t’ju ndihmojë dhe do t’ju bëjë të ndiheni gati për klasën pasardhëse. Prandaj, në asnjë moment mos iu ndani librit!” – thekson ministrja Kushi.

Ajo ka nënvizuar se falë punës dhe këmbënguljes së përbashkët, ky vit i vështirë shkollor u mbyll me sukses, dhe kjo është kënaqësi dhe krenari për të gjithë bashkë.