Mirela Bogdani, zgjidhet në krye të qeverisë së prokurorëve. Ishte garuesja e vetme për pozicionin e kryetarit

Mirela Bogdani është kryetare e Këshillit të Lartë të Prokurorisë. Anëtarja e KLP prej vitit 2022, e zgjedhur nga radhët e pedagogëve të së drejtës për vendet e Shoqërisë Civile në Këshill, do të drejtojë Këshillin, që është qeveria e prokurorëve në vend.

Bogdani ishte garuesja e vetme për pozicionin e kryetarit. Mirela Bogdani pason në këtë detyrë Alfred Ballën, mandati i të cilit u ndërpre më 27 maj, për shkak të një vendimi të Shkallës së Dytë të Vetingut, që urdhëronte përjashtimin e tij nga funksionet në drejtësi për një periudhë 15 vjeçare.

Në platformën me të cilën bindi në bllok kolegët, ajo nënvizonte nxitjen e bashkëpunimit me partnerët ndërkombëtarë, Prokurorin e Përgjithshme, KLGJ-në, Shkollën e Magjistraturës, ILD-në dhe Kuvendin, si edhe ndryshime ligjore për një Këshill sa më efektiv.