Misteri i virusit, përse Covid-19 vret të rinjtë? Studimi thotë se…

Jo më mosha e tretë. Covid 19 është thënë dhe stërthënë se prek më shumë të moshuarit, veçanërisht ata me sëmundje të mëparshme por tashmë nuk është kështu. Teksa historitë shtohen, po bëhet e qartë edhe se shumë njerëz, të rinj, sëmuren dhe humbin jetën madje, edhe pa sëmundje të tjera të mëparshme. Kemi mësuar tashmë se të rinjtë dhe të shëndetshmit nuk janë domosdoshmërisht imun ndaj këtij infeksioni dhe se mund të sëmuren po ashtu.

Qendra amerikane për kontrollin dhe parandalimin e sëmundjeve, në një studim paraprak të 2449 pacientëve, thotë se 18 për qind e atyre që u shtruan në spital, ishin të moshës 45-54 vjeç dhe 20 për qind, të moshës nga 20 në 44 vjeç. Të rinjtë, sipas doktor Antoni Faucit, janë më pak të predispozuar të humbin jetën por ka edhe një element të ri, ende të paqartë që e bën koronavirusin një sëmundje shumë të pazakontë.

“Ka diçka që ne nuk po e kuptojmë. Nuk mendoj se ka të bëjë vetëm me moshën apo sëmundjet e mëparshme. Ka diçka tjetër që shpresoj ta zbulojmë shpejt”. Kërkuesit mendojnë se përgjigjja mund të gjendet në gjenet tona dhe po përpiqen të kuptojnë se çfarë i dallon njerëzit që e kalojnë sëmundjen lehtë nga ata që vdesin. Ekziston edhe mundësia që një përbërës i prodhuar nga trupi, i njohur si surfactant që lejon mushkëritë të zgjerohen dhe kontraktohen, mund të bëhet i padobishëm tek disa pacientë të prekur nga koronavirusi.