Mjekë, psikologë…/ Ja si do të rehabilitohet Floresha Rasha e 4 fëmijët e mitur. Do mbikqyren nga antitetorri

Kthimi nga kampet e luftës në Siri i gruas shqiptare, Floresha Rasha dhe tre fëmijëve të saj, Amar, Emel, e Hatixhe Rasha si dhe të miturit Endri Dumani, u prit  një ditë më parë me entuziazëm, por tani fillon puna e vështirë për rehabilitimin e tyre.

Gazetari i Ora News, Besar Bajraktaraj, bën të ditur se të kthyerit nga kampet e luftës në Siri janë dërguar në shtëpinë e pushimit në Durrës, në qendrën në të cilën ato do të qëndrojnë për një kohë të gjatë, deri në rehabilititimin e plotë të tyre dhe riintegrimin në shoqëri.

Plani afatgjate
“Burimet bëjnë me dije se është ngritur një grup pune i përbërë nga disa institucione, si Ministria e Shëndetësisë, Ministria e Arsimit, Ministria e Brendshme dhe Agjencia Kundër Ekstremizmit të Dhunshëm, të cilët kanë hartuar planin e punës për mënyrën se si do të vijojë trajtimi i 5 shqiptarëve të riatdhesuar.

Mësohet se plani i punës do të jetë afatgjatë. Aktualisht secilit prej tyre i është vendosur në dispozicion nga një mjek, infermier, psikolog, si dhe një ekspert arsimi. Burimet shtojnë se gjendja e tyre shëndetësore paraqitet e mirë, por më problematike kanë anën psikologjike. Kjo pasi të riatdhesuarit kanë shfaqur shenja frike.

Nga grupi i punës mësohet se fillimisht me ta po punohet për ambientimin e tyre në territorin shqiptar.

Nuk ka një afat të caktuar se sa 5 shqiptarët do të qëndrojnë në Kavalishencë në Durrës, ndërsa takimet me familjarët nuk do u ndalohen.

Po ashtu, pjesë e grupit të punës do të jetë edhe njësia e Antiterrorit. Edhe pse nuk do të kenë agjentë pranë godinës ku janë strehuar 4 fëmijët dhe Floresha Rasha, sërisht ata do të vëzhgohen në distancë.

Kjo për shkak të dyshimeve se mund të kenë lidhje me persona që mund t’i nxisin për qëllime terroriste.