Mjekja e familjes: Roli ynë, kyç në mirëmenaxhimin e Covid-19

Në një intervistë për gazetaren Matilda Mcini në Ora News, mjekja e familjes Blerta Qinami ka shpjeguar ecurinë e pandemisë Covid-19 në vendin tonë dhe trajtimi që po u bëhet qytetarëve.

Sipas saj, mjeku i familjes është një hallkë e rëndësishme në luftën kundër virusit.

“Fillimisht ju falenderoj për ftesën dhe ju përgëzoj që keni gjetur pak kohë për ti kushtuar edhe mjekëve të familjes. Në gjykimin tim, mjekët e familjes janë një nga hallkat më të rëndësishme të këtij zinxhiri, për të mirëmenaxhuar situatën e pandemisë Covid-19.

Mjeku i familjes është në kontakt të përditshëm me çdo pacientët. Jemi në kontakt të përditshëm me pacientët kronikë, rrallë kemi pacientë që mund të vijnë për emergjenca. Por në Covid-19, roli ynë është një rol kyç”, u shpreh mjekja e familjes Blerta Qinami.

Sipas doktoreshës, që prej marsit 2020, mjekët e familjes janë udhëzuar “për të menaxhuar çdo pacient, i cili është i dyshuar për Covid-19 apo i konfirmuar për Covid-19”.

Kujtojmë se, ditën e sotme u regjistrua një numër rekord infektimesh ditore, plot 711 raste të reja, shifra më e lartë që nga nisja e pandemisë.