Mjeku Pëllumb Pipero: Shqipëria e kaloi pikun e pandemisë

Ndërsa qeveria thotë se do të marrë masa më të ashpra për të frenuar koronavirusin ekspertët mendojnë se Shqipëria e ka kaluar fazën kritike të pandemisë.

“Unë besoj që ne e kemi kaluar kulmin e epidemisë javën e shkuar”. Kështu u shpreh në emisionin “Opinion” mjeku Pëllumb Pipero, i cili tha se beson që në fillimin e javës tjetër numri i personave të prekur nga koronavirus të vijë duke rënë.

“Ka disa indikatorë që unë i konsideroj shumë të rëndësishëm. Në mendimin tim, kurba ka qenë e butë, jo shumë problematike për kapacitetet tona shëndetësore dhe kjo falë një sërë masah efektive dhe kërkesës së llogarisë për t’i zbatuar këto masa. Një rol të rëndësishëm kanë dhënë edhe këshillat e specialistëve. Rënia numrit të telefonatave tek 127 është i dukshëm, ulja e rasteve që shtrohen çdo ditë dhe shtimi i rasteve të shëruara apo atyre që dalin çdo ditë është i dukshëm. Një indikator tjetë i rëndësishëm është, jo ulja e numrit të rasteve që merrren përmes testimeve, por ulja e përqindjes. Pra, sot kishim 9 raste dhe janë realizuar 230 mostra, pra është ulur përqindja e pozitivitetit”, tha Pipero.

Mjeku i njohur thotë se në fund të muajit prill numri i infektimeve do të jetë shumë i ulët. “Duke gjurmuar rastet e kontaktit, ne kemi patur përqindje relativisht të lartë 15% apo 16 % të pozitivitetit. Kjo kurbë tek ne ka patur dy kulme të vogla. Unë besoj që ne e kemi kaluar pikun e epidemisë javën e shkuar, tani jemi në atë që ne e quajmë sheshpushim dhe besoj që fillimin e javës tjetër numri do shkojë duke rënë. Besoj që nga fundi i prillit numri do të jetë shumë i ulët. Ndoshta do të kemi disa raste sporadike në maj. Jam shumë optimist që paralelisht me të do të shkojë dhe lirimi i masave”, deklaroi mjeku i njohur.