Moti në Kosovë drejt minus 20 gradë
Rënia e temperaturave ka bërë që gjatë orëve të fundit, reshjet e shiut të shndërrohen në dëborë. Meteorologët parashikojnë që gjatë orëve në vijim, Kosova të jetë nën ndikimin e masave të ftohta të ajrit me origjinë siberiane.
Sipas Institutit Hidrometeorologjik i Kosovës, këto masa ciklonike do të ndikojnë në prishjen e këtij ekuilibri termik, i cili ka karakterizuar vendin gjatë tetë ditëve të fundit.
“Sipas parashikimeve sinoptike, reshjet e borës do të vazhdojnë gjatë fundjavës edhe në pjesën e parë të ditës së hënë. Karakteristikë e kësaj gjendjeje meteorologjike është edhe rënia e theksuar e temperaturave minimale, të cilat ishin parashikuar qysh më herët, por që besueshmëria për një çrregullim të madh të motit sipas parashikimeve të fundit gjithnjë është duke u rritur”, thuhet në komunikatën e IHMK-së.
IHMK-ja thotë se nga dita e shtunë dhe në ditët në vijim, vlerat e temperaturave minimale dhe maksimale do të jenë negative.
Nga dita e hënë e deri të premten, IHMK-ja parashikon që temperaturat minimale do të zbresin dukshëm diku nga -16 deri -19 gradë Celsius.
“Në bazë të paralajmërimeve meteorologjike se do të ketë borë dhe acar gjatë fundjavës dhe javës që vjen, Komuna e Prishtinës i ka bërë të gjitha përgatitjet e nevojshme për mirëmbajtjen e rrugëve të qytetit”, thuhet në një komunikatë të kësaj komune.
Sipas komunës, në kushte atmosferike ekstreme vështirësohet pastrimi i rrugëve nga bora dhe akulli, prandaj Komuna e Prishtinës kërkon nga drejtuesit e makinave që t’i kenë të gjitha pajisjet dimërore siç janë të obliguar me ligj dhe të mos dalin të papërgatitur në rrugë, pasi bllokojnë qarkullimin dhe shkaktojnë kaos në qytet.