Muhaxheri u arrestua nga agjentë rusë në Kaçanik?

Një lajm i çuditshëm qarkullon pasditen e së martës në portalet shqiptare online. Sipas tyre, një gazetar i emisionit italian investigativ “Le Iene” ka thënë se Lavdrim Muhaxheri, xhihadisti më i njohur shqiptar që dyshohet se fshihet në Kaçanik të Kosovës, është arrestuar nga shërbimet sekrete ruse, pasi dyshohet se ai është i përfshirë në rrëzimin e avionit rus. Sipas gazetarit, operacioni antiterror është shtrirë në Bosnje dhe në Jug të Kosovës, ku Muhaxheri fshihej. Ai ndodhej në Kaçanik i plagosur dhe se shërbimet sekrete kosovare kanë bërë një mbledhje urgjente për këtë çështje. Ai tha në emision se këtë ia kishte konfirmuar edhe një banor i Kaçanikut, që ishte i përfshirë me ISIS-in. Mirëpo, sipas portalit të Kosovës “Telegrafi”, autoritetet vendase e kanë hedhur poshtë çdo version se Muhaxheri gjendet në Kosovë dhe se shërbimi sekret rus kryen operacione apo arrestime atje.(lapsi)