Mungesa e opozitës, Bordi i Monitorimit të Medias në vështirësi

Në mungesë të opozitës politike në zgjedhjet e 30 qershorit, Komisioni Qendror i Zgjedhjeve (KQZ) ka vendosur që televizioni publik t’i japë kohë të barabartë në ekran Partisë Socialiste. Ylli Pata, kryetar i bordit, shprehet: “Monitorimi i aktivitetit të forcave politike që nuk marrin pjesë në zgjedhje është jashtë elektoral dhe ne i kemi kërkuar mendim KQZ-së”.

Artan Cena, anëtar i bordit, thotë: “Në këtë situatë, nuk mund ta barazojmë me askënd Partinë Socialiste. Çdo media do t’i japë hapësirë aq sa mundet në fushatë dhe nuk ka me kë të krahasohet”.

Si duhet të trajtohen gjatë kësaj fushate partitë më të vogla apo forcat e reja politike si Bindja Demokratike? Edhe vetë anëtarët e Bordit të Monitorimit të Medias kanë mendime të ndryshme. “Do ta diskutojmë këtë gjë. Por, unë mendoj që të kenë hapësirën e duhur”, tha Pata për ”A2 news Cnn”. Bordi i Monitorimit të Medias reflekton aktualisht vakancat mes anëtarëve të KQZ-së dhe ka vetëm 5 anëtarë nga 7 që përcakton ligji.