Ndryshimet në ligjin e TVSH-së – Preken makineritë bujqësore, miratohet lista e inputeve

Vendimi për përjashtimin nga TVSH të inputeve bujqësore ka hyrë zyrtarisht në fuqi bashkë me listën e detajuar të farave, fidanëve dhe pesticideve që do të tregtohen pa ngarkesë fiskale.

Ndërkaq, përpos listës janë bërë edhe disa ndryshime sa i përket importit të makinerive bujqësore pa TVSH.

Në vendimin e mëparshëm, këto pajisje kanë qenë të përjashtuara automatikisht nga Tatimi mbi Vlerën e Shtuar, pikë kjo që është shfuqizuar në vendimin aktual, dhe trajtimi do të bëhet i njëjtë me pajisjet e tjera.

Kështu referuar ndryshimeve “importimi i makinerive dhe pajisjeve të përcaktuara në pikën 1, të nenit 8, është furnizim i përjashtuar nga TVSH-ja, vetëm në rastet kur të tilla makineri dhe pajisje importohen në funksion të realizimit të kontratave të investimeve dhe importuesi është vetë personi i tatueshëm që realizon investimin ose përdor makinerinë ose pajisjen. Personat e tatueshëm, që importojnë makineri dhe pajisje për shitje, nuk janë subjekte përfituese të përjashtimit nga TVSH-ja”.

Edhe në këtë pikë, përjashtim kanë bërë tatimpaguesit që importonin makineri bujqësore, por që tashmë nuk do ta kenë më atë status special.