Ndryshimi në Kodin Rrugor, ”shoferët e rinj” me makina me fuqi motorike të ulët

Viktima dhe shkaktarë të aksidenteve tragjike kohët e fundit të fundit në vend kanë qenë të rinjtë, ndaj dhe Kodi Rrugor ka pësuar ndryshime. Drejtuesve të mjeteve të drejtimit të kategorisë B, pra të makinave, nuk do u lejohet në dy vitet e para të lëshimit të patentës të drejtojnë mjete me fuqi më të madhe se 55 kw/ton, ndërkohë për makinat hibride elektrike ose Plug-in, kufiri i lejuar i fuqisë, për këta drejtues, do të jetë 65kw/ton duke përfshirë këtu edhe peshën e baterisë.

Afatet e rinovimit të patentave të tipit AM, A1, A2, A, B1, B dhe BE janë rritur nga 10 vite në 15 për të gjithë drejtuesit deri në 70, ndërsa pas moshës 70 konfirmimi i vlefshmërisë së patentës mund të bëhet vetëm pas dorëzimi të certifikatës mjekësore.

Qytetarët të cilëve u është anuluar leja e drejtimit shqiptare për shkak të konvertimit jashtë vendit, do mund ta rimarrin atë pa testim edhe nëse leja e drejtimit e huaj ka skaduar. Ata mund ta rimarrin patentën shqiptare duke e dorëzuar dhe duke hequr dorë vullnetarisht nga patenta e huaj. Ka një rritje të moshës edhe për ushtrimin e profesionit të instruktorit të autoshkollës e cila nga 65 që është aktualisht do të shkojë 70.