Në Bari, rruga “Viale Albania” i dedikohet Shqipërisë (Fotolajm)

Në ambientet e panairit “Fiera del Levante” në Bari, u inaugurua sot një rrugë dedikuar Shqipërisë.

Tabela “Viale Albania” -Rruga Shqipëria, në Fiera del Levante të Barit simbolizon marrëdhëniet e hershme tregtare mes Italisë dhe vendit tonë , duke bërë që shumë  shqiptarë të ndihen krenarë.

Në ceremoninë e posaçme organizuar më këtë rast, ishin të pranishëm Kryeministri Edi Rama, presidenti i Rajonit të Puglias Michele Emiliano, kryetari i bashkisë së Barit Antonio Decaro si dhe Presidenti i Fiera del Levante,  Ugo Griffi.  

Rruga “Albania” ndodhet brenda territorit prej 280 mijë metra katrorë të panairit ndërkombëtar “Fiera del Levante”.

Kryeministri Rama është i ftuari i nderit në takimin ndërkombëtar “Rrugët e reja të Levantes.Sipërmarrjet e vendeve të jugut e sfida e internacionalizmit”, që organizohet sot gjatë panairit “Fiera del Lavante”, në qytetin e Barit.

Në ambientet e dhomës së Tregtisë së qytetit të Barit, Kryeministri Rama do të zhvillojë një bashkëbisedim me sipërmarrës italianë dhe të huaj, përfaqësues të kompanive të rëndësishme multinacionale, gazetarë e ekspertë të ekonomisë botërore. 

Panairi Ndërkombëtare i Barit, i inauguruar për herë të parë më vitin 1930, çdo vit është një nga manifestimet më të rëndësishme në aktivitetin e sipërmarrjes italiane në shumë sektorë e të bashkëpunimit të tyre me vendet e territoret përreth.

Këtë vit, panairi do të qëndrojë i hapur nga datat 12-20 shtator me pjesëmarrjen e rreth 2000 sipërmarrësve vendas dhe të huaj.