Në pranga 9 shoferë dhe gjobiten mbi 1600, Policia: Në çdo aks rrugor ka patrulla (VIDEO)

Në aksionin e Policisë Rrugore për 24 orët e fundit, janë arrestuar 9 drejtues mjetesh, ku 5 prej tyre u identifikuan në gjendje të dehur, ndërsa 4 të tjerë pa patentë. Po ashtu 1654 shoferë janë gjobitur për shkelje të rregullave të qarkullimit rrugor.

Po ashtu janë pezulluar 41 leje drejtimi, 25 për shpejtësi mbi normat e lejuara që varionin nga 152 km/h në Levan -Vlorë, 154 km/h në Tiranë-Elbasan gjatë natës, dhe deri në 185 km/h në Bypass-in e Fierit dhe 16 për drejtim mjeti në gjendje të dehur.

Policia paralajmëron se në çdo aks rrugor të vendit ka patrulla të policisë rrugore për të garantuar sigurisë e jetës së qytetarëve.

Njoftimi i policisë

Policia Rrugore vijon monitorimin e pandërprerë në të gjitha akset rrugore nacionale, qendrat urbane dhe akset kryesore rurale me qëllim parandalimin e aksidenteve rrugore dhe rritjen e parametrave të sigurisë rrugore.

Përgjatë 24 orëve të fundit janë arrestuar në flagrancë 9 drejtues mjetesh dhe motomjetesh, nga të cilët 4 për drejtim mjeti pa leje drejtimi dhe 5 për drejtim mjeti në gjendje të dehur.

Si rezultat i monitorimit me radar dhe alkooltestues, janë pezulluar 41 leje drejtimi, nga të cilat 25 për shpejtësi mbi normat e lejuara që varionin nga 152 km/h në Levan -Vlorë, 154 km/h në Tiranë-Elbasan gjatë natës, dhe deri në 185 km/h në Bypass-in e Fierit dhe 16 për drejtim mjeti nën efektin e alkoolit apo në gjendje të dehur deri në masën 1.43 mg/l në Tiranë.

Po si rezultat i kontrolleve intensive dhe denoncimeve të adresuara në Komisariatin Digjital dhe në numrin pa pagesë 112, janë ndëshkuar me masë administrative, në të gjithë vendin, 1654 drejtues mjetesh, për shkelje që sjellin pasoja në jetën dhe shëndetin e përdoruesve të rrugës.

Mos qarkulloni me shpejtësi që cenojnë sigurinë e jetës në rrugë, mos drejtoni mjetin nën efektin e alkoolit apo në gjendje të dehur, mos kryeni parakalime të gabuara, mos përdorni celularin gjatë drejtimit të mjetit, qëndroni në radhë ku ka ngadalësim të lëvizjes, pasi fluksi i automjeteve në drejtim të zonave bregdetare e anasjelltas është shumë i lartë dhe të gjitha rrugët monitorohen nga Policia Rrugore duke përdorur bazën logjistike që ka në dispozicion.

Në çdo aks rrugor në të gjithë vendin ka patrulla të Policisë Rrugore me për një qëllim: sigurinë e jetës. Respektoni rregullat e qarkullimit rrugor që të arrini në destinacion të sigurt dhe me patentë në xhep. Ftojmë qytetarët që të denoncojnë në numrin 112 dhe në Komisariatin Digjital, çdo shkelje të Kodit Rrugor, duke iu garantuar anonimat të plotë dhe një reagim të shpejtë dhe profesional.