Nën hetim 4 farmaci fiktive, përfituan 550 mln lekë me ilaçet e rimbursuara

Prokuroria e Tiranës nisi hetimin për 4 farmaci fiktive, të cilat me anë të recetave të rimbursueshme, që dyshohet se janë falsifikuar kanë përfituar rreth 550 milionë lekë.

Kallëzimi është dorëzuar vetëm pak ditë më parë, pasi Fondi i Sigurimeve të Kujdesit të Detyrueshëm Shëndetësor ka rimburësuar të gjitha këto receta, që mendohet se janë falsifikuar.

Nga verifikimi paraprak, dyshohet se recetat e rimburësuara janë lëshuar vetëm nga këto 4 farmaci, të cilat nuk ekzistojnë dhe nuk janë të regjistruar në asnjë nga institucionet shtetërore.

Recetat  rimburësuara, sipas akuzës, janë firmosur nga më shumë se 80 mjek të ndryshëm të familjes në qendrën shëndetësore. Mësohet se çdo recetë ka emër konkret të pacientit, moshën dhe diagnozën për të cilën kërkohet marrja e ilaçit, që në të shumtën e rasteve janë mjekime për sëmundjet kancerogjene.

Vlera e këtyre ilaçeve të rimburësuara, sipas hetuesve, kap shifrën nga 350 deri 800 mijë lekë e që në total kap shifrën e rreth 550 milionë lekëve. Ky abuzim i rimbursimit tashmë, sipas burimeve nga Prokuroria e Përgjithshëm ka ndodhur gjatë periudhës nëntor 2014 deri në prill të 2015.

Hetuesit thonë se referuar materialit kallëzues, thuajse të gjithë mjekët e pyetur, emrat dhe vulat e të cilëve ndodhen në recetë kanë mohuar se kanë lëshuar receta të tilla, për këtë fakt ka lindur dyshimi se po abuzohet me këto receta të rimburësimit.

Sipas prokurorisë e cila tashmë ka nisur hetimet do të pyetën të gjithë mjekët, emrat e të cilëve ndodhen në këto receta.  Mësohet se po punohet edhe në aspektin administrativ për të verifikuar kush janë personat pas këtyre 4 farmacive fiktive. Për hetuesit ajo që do të arrije të provojë dhe identifikojë personat, janë kamerat e sigurisë së bankave ku të dyshuarit kanë tërhequr paratë e rimburësimeve nga Fondi i Sigurimeve të Kujdesit të Detyrueshëm Shëndetësor.

Sipas akuzës, është kërkuar nga bankat e nivelit të dytë, të identifikojnë personat në emër të cilëve janë hapur llogarit bankare ku Fondi i Sigurimeve të Kujdesit të Detyrueshëm Shëndetësor i ka rimbursuar dhe personat e tërheqjes së këtyre parave.