Nëna e Endrit po e pret në Rinas, vajza ende në kamp. Burri u vra në Siri

Nëna e Endri Dumanit është duke pritur për të birin në aeroportin e Rinasit, i cili po riatdhesohet në vendlindje pas viteve qëndrim në Siri. Familjarët kanë bërë me dije se e reja nuk mund të flasë për mediat, pasi është shumë e emocionuar për kthimin e të birit, ndërkohë që në pamjet e publikuara ajo shfaqet vetëm duke qarë dhe duke u dridhur. Nga ana tjetër, gëzimi nuk është i plotë pasi në kampin Al-Hawl ndodhet ende vajza, Eva Dumani.

E quan ditën më të bukur të jetës së tij momentin kur ka marrë vesh lajmin që Endri Dumani do të kthehet në atdhe. Edhe pse i vogël në moshë ai mezi pret që të ta takojë. “Më ka munguar shumë dhe nuk kam pasur mundësi ta takoj, kur mora lajmin nuk e besoja, por kur e pashë me sytë e mi, atë ditë nuk fjeta nga emocionet, ka qenë dita ime më e mirë”, tha kushëriri.

Sonja Ndregjoni, kushëria e Endrit, në një prononcim për Report Tv, rrëfeu emocionet e këtij momenti. “Kontaktin e fundit e kemi pasur para 7 vitesh është një ëndërr e bërë realitet për të gjithë familjen, kemi shpresuar dhe kërkuar dhe tani na duket pak e pabesueshme. Do ishte mrekulli që Eva të ishte sot, por për disa shkaqe që nuk e di, shpresoj që të vij dhe ajo. Ne jemi një familje shumë e madhe, e presin xhaxhallarët, daja, mamaja e tij që ka gjithë këtë video që ëndërron këtë moment, Endi nuk do jetë kurrë vetëm sa ka qenë këto 7 vite. Ato kanë pasur kontakt me babain tim, Eva është shprehur e frikësuar, ajo nuk di se kujt t’i besoj, por ia dolëm që të marrim Endrin. Jemi shumë familjarë këtu. Shtëpia e Endrit dhe Evës është shitur, kemi mundësinë që të kemi gjetur një shtëpi tjetër, aty është dhoma e Endrit dhe Evës, vetëm ato mungojnë”, tha Sonja.