Nga sot masa të rrepta kufizuese në Kakavijë! Çfarë duhet të dini para se të udhëtoni për në Greqi?

Që prej ditës së sotme hyjnë në fuqi masat e reja anti COVID në Greqi, me disa kufizime. Ministria e Europës dhe Punëve të Jashtme ka njoftuar se që prej ditës së sotme (1 mars) deri në 15 mars, është vendosur që në pikën e kalimit kufitar të Kakavijës të kufizohet numri i qytetarëve që do të kalojnë çdo ditë. Më parë në këtë pikë kufitare lejohej të kalonin 750 qytetarë, ndërsa ky numër tani është reduktuar në 400.

Gjithashtu edhe ditët e karantinimit për personat që do të rezultojnë pozitivë do të zgjatet nga 7 në 14 ditë. Ndërkohë pritet të ketë edhe reduktim në orarin e lëvizjes duke lejuar qarkullimin 12 orë në ditë prej orës 07:00 deri në orën 19:00.

Për të gjithë personat që do të hyjnë në Greqi, përjashtuar shtetasit shqiptarë, testi i shpejtë COVID do të ndërmerret edhe tek shoferët e kamionëve të cilët kanë qenë të përjashtuar deri më sot. Kujtojmë se Pikat e Kalimit në Kosovë, Maqedoni dhe Malin e Zi vijojnë të jenë të hapura dhe shtetasit shqiptarë mund të udhëtojnë drejt këtyre vendeve, pa pasur nevojë për PCR test negativë dhe pa iu nënshtruar masave të izolimit.