Njohja e lejeve të drejtimit me Gjermaninë, Cakaj: Dinamikë e shtuar drejt marrëveshjes përfundimtare
Aktualitet E Enjte, 13 Shkurt 2020 16:09
Ministri në detyrë për Europën dhe Punët e Jashtme, zhvilloi një takim me Drejtorin e Përgjithshëm të Trafikut Rrugor dhe Transportit në Ministrinë Federale të Transportit, Guido Zielke.
Në një reagim ministri i Jashtëm në detyrë Cakaj bëri me dije se pas procesit të verifikimit teknik për procedurat e marrjes së lejeve të drejtimit dhe sigurinë në trafik në Shqipëri, do të vazhdohet menjëherë me dinamikë të shtuar drejt marrëveshjes përfundimtare, e cila sipas Cakaj do të lehtësojë jetën e shqiptarëve në Republikën Federale të Gjermanisë.
Cakaj sqaroi gjithashtu se e gjithë praktika do të zgjasë në kohë, për shkak se procesi i vendimmarrjes për njohjen e patentave duhet të shqyrtohet në të 16 landet e Gjermanisë, përpara se të kalojë për miratim në nivel federal.
Kryediplomati siguroi se Qeveria shqiptare nuk do të kursejë asnjë përpjekje për ta arritur marrëveshjen sa më parë. “Ne do të vazhdojmë punën për të ndërlidhur objektivat madhore të politikës së jashtme me nevojat ditore të qytetarëve shqiptarë”, – tha Cakaj. /Ata
