Noka thirrje socialistëve: Bashkohuni në protestë, Rama është dhe armiku juaj

Sekretari i Përgjithshëm i PD-së së Rithemelimit, Flamur Noka, ka deklaruar se socialistët nuk i kanë armiq por kundërshtarë, ndërsa u ka bërë thirrje të bashkohen në protestat e tyre.

Gjatë mbledhjes së Këshillit Kombëtar të PD-së, ai u shpreh se Edi Rama nuk është vetëm armik i opozitës, por edhe i vetë socialistëve.

“Ne tashmë e dimë të gjithë se kush është Edi Rama. E dimë dhe para se Ahmetaj të na e thoshte publikisht. Ne kemi shumë vite që ua themi shqiptarëve, e themi që ta marrin vesh dhe socialistët e ndershëm. Ahmetaj tha se kur ta marrin vesh socialistët se kush është Edi Rama do të jetë vonë. A na intereson si opozitarë kjo. Patjetër, sepse jemi kundërshtar të PS-së, por ne nuk jemi armiq të socialistëve. Ne dhe socialistët vetë kanë një armik, që është Edi Rama, jo thjesht PD”, tha Noka.

“Ka një gjë, që bëjnë sikur se kuptojnë, Rama po përpiqet ta asgjësojë opozitën për interesa të pushtetit dhe klanit të tij. Ne demokratët, u themi dhe socialistëve, se beteja nuk është përpjekje për t’u mbajtur në pushtet, por për të instaluar vetëm një njeri në pushtet. Ftojmë jo vetëm demokratët, por cdo socialist të reagoj dhe të bashkohet me ne në mosbindjen civile për ta gjunjëzuar këtë regjim”, shtoi ai.