Nuk ka dakordësi për fletën e votimit, PS preferon modelin e Kosovës

Ndryshe nga vitet e tjera, me 25 prill qytetarët do të votojnë për partitë politike ose koalicione si dhe për kandidatët. Fleta e votimit do të jetë më e komplikuar për votuesi dhe për këtë mazhoranca dhe opozita kanë menduar për modelin që sipas tyre është më i përshtatshëm për kushtet e Shqipërisë. Dhe kur flitet për pushtet, PS dhe PD ndahen në qëndrime.

Nga 5 modelet të cilat po shqyrtohen nga KQZ, PS preferon këtë fletë votimi, e cila ndahet në dy pjesë.

Lista e partive/koalicioneve në njërin krah dhe në gjysmën tjetër të fletës numrat të cilat përfaqësojnë kandidatët për një qark të caktuar.

Me këtë model nëse një votues do të votojë X parti, atëherë automatikisht numrat i korrespondojnë këtij subjekti, të cilës votuesi i ka vendosur shenjen e preferencës.

Në këtë mënyrë shmanget që fleta të bëhet e pavlefshme pasi është e pamundur që qytetarët të votojnë një parti dhe kandidatin e një partie tjetër.

Ndërsa PD kërkon që në fletën e votimit, poshtë emrit të partisë/koalicionit, të vendoset kandidati me emër dhe mbiemër.

Por në këtë fletë votimi ekziston mundësia që votuesi të zgjedhë partinë dhe kandidatin nga një tjetër subjekt, çka do ta bënte fletën e pavlefshme.

Por në të dyja raste apo në modelet e tjera që po shqyrtohen nga KQZ, do të vështirësohet numërimi, pasi përveç votës për partitë duhet të numërohen edhe votat për kandidatët.