Nuk ndali dasmat paçka gjobave, arrestohet pronari i lokalit. I proceduari i parë sipas Kodit Penal

Dëshira e çifteve për një dasmë me miq dhe farefis edhe pse në kohë pandemie dhe tundimi i pronarëve të lokaleve për të shtuar fitimet në dhjetëra raste ka rezultuar më i madh se frika e të dy palëve nga situata. Pandemia e Covid-19 vijon që të jetë agresiv në vendin tonë dhe këtë e tregojnë shifrat e raportuara nga Ministria e Shëndetësisë.

Një 52-vjeçar, pronar i një lokali në Durrës, është arrestuar pasi ka shkelur në mënyrë të përsëritur masat anti-covid, duke organizuar dasma në ambientet e aktivitetit të tij. 52-vjeçari S.P, është gjobitur dy herë me nga 1 000 000 lekë si dhe i ishte pezulluar aktiviteti për 6 muaj, por sërish nuk është bindur që masat anti-covid duheshin zbatuar duke vijuar të organizonte sërish dasma. Gjatë kontrollit të policisë, edhe pse aktiviteti i tij ishte i pezulluar, ai është gjetur duke organizuar sërish ceremoni martesore në kundërshtim me Aktin Normativ për marrjen e masave me qëllim parandalimin e përhapjes së Covid-19.

Shkelja e përsëritur e protokolleve të sigurisë ka bërë që 52-vjeçari të arrestohet në flagrancë. Për rrezikshmërinë e virusit dhe zbatimin e detyrueshme të protokolleve për parandalimin e përhapjes së Covid-19 duket se ka ende persona të pandërgjegjësuar, që vijojnë të mos zbatojnë rregullat pavarësisht paralajmërimeve dhe gjobave të vendosura.