Nusja e djalit u infektua nga koronavirusi në fasoneri, vjehrri kërkon ndihmë nga shteti

Nusja e djalit të Muratit nga Fushë-Mamurrasi është infektuar në një fasoneri në Krujë nga koronavirusi.

Ai bën të ditur për ABC News se familja është distancuar dhe e prekura është izoluar në një prej dhomave të shtëpisë.

Nusja e djalit e mësoi lajmin disa ditë pasi puna u mbyll.

“I kanë thënë që nuk do shkojë në punë. Ajo po qëndron në dhomë më vete”.

Murati jeton në një tjetër banesë dhe tregon për gjendjen e saj shëndetësore.

“Rri në shtëpi më vete. Nuk ka asnjë shenjë, është mirë. Nuk ka as temperaturë, asgjë ska”.

Përhapja e Covid 19 në këtë fshat, ka alarmuar dhe banorët e tjerë, që siç duket e nga pamjet pak qarkullojnë nëpër rrugë.

“Po qe për shtetin na ka lënë në rrugë të madhe. Masat i ka marrë populli vetë ishalla vjen shteti bën ndonjë tampon”.

Fushë Mamurrasi është fshati i Kurbinit me 7000 banorë që janë të trembur nga infektimi nga virusi i ri dhe po përpiqen që të mbrohen sadopak, duke mos frekuentuar të afërmit e tyre.