Obama: Marrëveshja e Parisit, shansi më i mirë për të shpëtuar planetin

Presidenti i Shteteve të Bashkuara të Amerikës, Barack Obama ka përshëndetur marrëveshjen e klimës arritur në Paris si të fortë dhe historike, duke e quajtur atë shansin më të mirë për të shpëtuar planetin nga efektet e ndryshimit të klimës globale.

"Sot populli amerikan mund të jetë krenar, sepse kjo marrëveshje historike është një vlerë për lidershipin amerikane.

Gjatë shtatë viteve të fundit, ne kemi transformuar Shtetet e Bashkuara në udhëheqës global në luftën kundër ndryshimeve klimatike", tha Obama.

Ai tha se marrëveshja tregon se çfarë është e mundur kur bota qëndron si një, duke shtuar se kjo marrëveshje paraqet shansin më të mirë që kemi për të shpëtuar një planet që ne kemi.

Duke folur në Shtëpinë ë Bardhë, disa orë pas përfundimit të kësaj marrëveshje, Obama tha se "asnjë marrëveshje nuk është e përsosur, duke përfshirë edhe këtë," dhe se negociatat që përfshijnë rreth 200 kombe janë gjithmonë të vështira.